وردنا الان رئيس المؤتمر يكشف لأول مرة عن رسالة وصلته من مسافر بين صنعاء وعدن فماذا حدث ؟

الأوراق برس

كشف رئيس المؤتمر الشعبي العام الشيخ صادق آمين ابو راس رياله مواطن يمني وصلاه يشرح فيها ماحصل له اثناء سفره من صنعاء الى عدن

موقع صحيفة الاوراق برس اليومي يعيد نشرها :

حيث كتب الشيخ صادق آمين ابو راس قائلا:

رسالة طويله الرسالة التالية من مسافر عبر عدن

تخيل ان معك والدك او والدتك او اخوك او اختك مريض وحالته الصحية متدهورة وقررت انك تسفره للعلاج في الخارج..

قمت تسلفت وبعت الذي فوقك والذي تحتك عشان تدفع قيمة التذاكر وحق العلاج..

ولان مطار صنعاء مغلق مامعك الا تسافر من مطار عدن..

قمت تستاجر سيارة خاصة او سيارة اسعاف عشان تنقل بها المريض وتدفع اجرتها الباهضة في سبيل نقل المريض بسلام..

وسفر بالسيارة ببطئ لساعات وساعات وكل شوية وانت عينك على المريض وهو مركب للاكسجين ومنتظر في اي لحظة يقطع نفسه..

تنزل في إب تريح عشان المريض مش قادر يتحمل السفر لمدة أطول..

تستاجر فندق ويوم ثاني تتوكل تواصل السفر مروراً بالجبال والسوايل بسبب قطع الطرق وطوال الطريق سين وجيم في النقاط الامنية..

واخيراً وبعد مرور يومين توصل لامدينة عدن تستاجر فندق وتدخل المريض يرتاح عشان يوم ثاني تسافر للقاهرة..

يومين وقلوب اهلك معاك.. خايفين وقلقين عليك كل هذا وانت عادك داخل اليمن!!

يومين سفر وانت داخل اليمن بينما من عدن للقاهرة من دولة لادولة ثلاث ساعات ونصف!!

تبكر يوم ثاني.. توصل للمطار.. تتفاجئ بانهم يقلوا لك انت والمريض ماتقدروا تسافروا لان جوازاتكم صادرة من صنعاء!!

-تقلهم بس اليمنية قطعت لي التذكرة وماقالوا لي هذا الشيء..

يقلك عاد التوجيهات جت فجر..

-تقلهم في ناس سافروا قبلي والجواز هذا معترف به في القاهرة ومافيش اي مشكلة.. يقلوا لك ممنوع..

-تقلهم طيب ابي عيموت مريض اشتي اسعفه..

يقلك ممنوع توجيهات..

-تبكي وتمسك على راسك.. تترجاهم يقدروا وضعك ووضع المريض اللي معك..

يقلوا لك هذه توجيهات..

-تسألهم طيب ايش الحل؟!

مافيش حل الا انك تقطع جواز من عدن..

-كم عيجلس لما اقطعه؟!

ثلاثة اربعه اسابيع ويكفلك 150 الف، يعني انت والمريض 300 الف.. وتشتي مصروف وسكن طوال هذه المدة..

-طيب ليش ماتبلغونا وعاد احنا في صنعاء

ليش ماتقولوا لليمنية هذا الخبر قبلما نقطع التذاكر ونسافر لاهانا؟!

مش مشكلتنا دبر نفسك.. ممنوع من السفر وبس..

-طيب في ناس سافروا الايام الماضية وماحد منعهم..

ايوه هولا سافروا بزلط.. كان يدفعوا 100$ في المطار..

-طيب مش مشكلة شادفع كم تشتوا؟

اليوم ممنوع حتى بزلط.. بس بكرة بعده مدري..

-كيف مدري؟ ابي عيموت..

ياخي مدري..كله على مزاج المسؤولين.. احتمال يسمحوا لانه كل مرة يقلوا هكذا وبعدا يسمحوا..

-طيب قدروا حالة المريض.. حرام هكذا.. #اين_الانسانية؟

عفوا مانقدرش نعملك شيء.. لاتزعجنا..

ابوك مش مهم وامك مش مهمة وانت كمان مش مهم.. تعبك وسفرك وخسارتك ماتهم.. اهم شي هو راحة واستقرار المسؤولين وعيالهم ونسوانهم..

-ايش عمل المسؤولين؟!

يتكلموا عن معاناتك ويتاجروا بها.